बुटवल-कोरोना विशेष अस्पताल बुटवलमा मंगलबार उपचारका लागि आएका कपिलवस्तुका युवाको पीसीआर रिपोर्ट नेगेटिभ आएको छ।
कृष्णनगर नगरपालिका १२ का २५ वर्षीय युवा प्रदीप तेलीको पिसिआर रिर्पोट नेगेटिभ आएको लुम्बिनी प्रादेशिक अस्पताल कोरोना फोकल पर्शन डा सुदर्शन थापाले जानकारी दिए।
कपिलवस्तुको कृष्णनगर नगरपालिका वडा नम्बर १२ का तेलीको श्वासप्रश्वासमा समस्या आएपछि मंगलबार राति बुटवलस्थित अस्पताल ल्याएर भेन्टिलेटरमा राखिएको थियो।
थापाका अनुसार ती व्यक्तिको मृगौलामा समस्या देखिएको थियो।
उनको मंगलबार राती अस्पताल ल्याएर भर्ना गरेपछि मृत्यु भएको थियो। उनमा ज्वरो र निमोनियाको लक्षण देखिएकाले उनलाई कोरोना भाइरसको संक्रमणको आशंकामा कोरोना विशेष अस्पतालको भेन्टिलेटरमा राखेर उपचार थालिएको थियो। उपचारकै क्रममा उनको मृत्यु भएको थियो।
तेली यही साउन २४ गते भारतको मुम्बईबाट घर आएका थिए। भारतबाट नै आउँदा ज्वरो र रुघाखोकी देखिएपछि उनले कपिलवस्तुमा स्थानीय अस्पतालमा उपचार गराएका थिए। श्वासप्रश्वासमा समस्या देखिनुका साथै कोरोनासँग मिल्दोजुल्दो लक्षण भएपछि उनलाई काेराेना अस्थायी अस्पतालको भेन्टिलेटरमा राखिएको थियो।
मंगलबार नै अर्का एक व्यक्तिको मृत्यु भएको थियो। यही साउन २५ गते अस्पताल भर्ना भएका उनमा कोरोना भाइरसको संक्रमण पुष्टि भएको थियो।