काठमाडौ । प्रधानमन्त्री एवं नेकपा अध्यक्ष केपी शर्मा ओलीले अमेरिकन च्यालेञ्ज कर्पोरेसन (एमसीसी) बारे निकट भविष्यमा टुंगो लगाउने बताएका छन् । आईतबार नेकपाको केन्द्रीय समिति बैठकमा समापन मन्तव्य दिँदै प्रधानमन्त्री ओलीले एमसीसीबारे निर्णय गर्न ढिला नगर्ने बताएका हुन् ।
बुधबारदेखि सूरु भएको केन्द्रीय समिति बैठकमा अधिकांश सदस्यले अहिलेकै अवस्थामा एमसीसी अनुमोदन गर्न नहुने र विज्ञ समिति बनाएर त्यसबारे निर्णय हुनुपर्ने सुझाव नेतृत्वलाई दिएका थिए। केन्द्रीय समितिमा एमसीसीको मुद्दा जोडतोडले उठेपछि आईतबार बिहान बसेको सचिवालय बैठकले तीन सदस्यीय अध्ययन कार्यदल बनाउने प्रस्ताव केन्द्रीय समितिले पारित गरेको छ।
कार्यदललाई दस दिनमा प्रतिवेदन पेस गर्न समय दिइएको छ। नेकपा बरिष्ठ नेता झलनाथ खनाल संयोजक रहेको कार्यदलमा स्थायी समिति सदस्यद्वय भीम रावल र प्रदीप ज्ञवाली सदस्य छन्।
बैठकमा बोल्दै प्रधानमन्त्री ओलीले चीनमा फैलिएको कोरोना भाइरसबारे सरकार एकदमै संवेदनशील रहेको बताए। ‘शनिबार लामो बैठक भएको थियो। चीनबाट विद्यार्थीहरु ल्याएपछि खुरुखुरु परिवारमा पठाउने भन्ने हुन्न। त्यहाँ सुरक्षित छन्। ल्याएपछि १४ दिन क्वारेन्टाइनमा राख्नुपर्ने हुन्छ। यहाँ पनि महामारी फैलिए के गर्ने भन्ने हो। अहिलेसम्म १ जनामा थियो, त्यो ठीक भइसकेको छ। अहिले नेपालमा कोरोना भाइरस कसैमा छैन। सजग हुनुपर्ने हो तर डराउनुपर्ने अवस्था छैन,’ बैठकमा प्रधानमन्त्री ओलीले भने।
चीनमा रहेका नेपाली विद्यार्थीलाई लिएर आत्तिनुपर्ने अवस्था नरहेको भन्दै ओलीले चीनले नै व्यवस्था गरिरहेको जानकारी दिए। ‘उनीहरूलाई नेपाल ल्याउँदा भाइरस नफैलियोस् भन्नेमा सरकार सजग छ।’
पार्टीको विषयलाई लिएर प्रधानमन्त्री ओलीले केही संचारमाध्यमले गलत ढंगले व्याख्या गरेको पनि बताए।
‘देशको अपेक्षाअनुसार पार्टी एकढिक्का भएको छ। केही संचारमाध्यमले गलत ढंगले ब्याख्या गरेका छन्। आ–आफ्ना स्वार्थअनुसार टाउका जोडेर अखबारबाजी गरिएको छ। अंशबण्डाजस्तो गरिएको छ। टाउका जोडेर भाग लगाउने, भाग लगाएर बदनाम गर्ने कुरा भए। यी अनुचित कुरा हुन्। हामी पार्टीका हौं, पार्टीका बाहेक कसैका पिछग्गु होइनौं।’