बुटवल-उच्च अदालत तुलसीपुर बुटवल ईजलासले रणनीतिक योजनाले लिएका लक्ष्य पूरा गर्न दक्ष जनशक्ति अभाव भएको जनाएको छ ।
उच्च अदालत बुटवल ईजलासले चालू आर्थिक वर्षको माघ मसान्तसम्मको प्रगति विवरण सार्वजनिक गर्दै रणनीतिक योजनाले लिएका लक्ष्य पूरा गर्न समस्या भएको जनाएको हो ।
अदालतले कर्मचारीमा प्रविधिमैत्री ज्ञानको अभाव, कर्मचारीलाई पर्याप्त प्रशिक्षण अभाव, आवश्यक भौतिक सामग्रीको अभाव र अदालतको भवनको जीर्ण र अपर्याप्त अवस्थाका कारण लक्ष्य पूरा गर्न नसकेको अदालतका रजिस्ट्रार ध्रुवकुमार ढकालले जानकारी दिए ।
तर, अदालतले गतवर्षको तुलनामा मुद्दा फर्छ्योटमा सफलता हासिल गरेको जनाएको छ । उच्च अदालत तुलसीपुर बुटवल ईजलासले अदालत र सञ्चारकर्मीबीच गरेको अन्तरक्रियामा तथ्यांक प्रस्तुत गर्दै रजिस्ट्रार ढकालले चालू वर्षको पुस मसान्तसम्म २ हजार ८३ मुद्दामध्ये १ हजार १ सय १२ मुद्दा फैसला गरेको बताए ।
उनका अनुसार गतवर्ष पुसमसान्तसम्म १ हजार ६ सय ९७ मुद्दामध्ये ५ सय ३ वटा मुद्दा फैसला भएका थिए ।
उच्च अदालत तुलसीपुर बुटवल इजलासमा मुख्य भई काम गर्ने न्यायाधीश बाबुराम रेग्मीले अदालत गुणस्तरीय सेवा दिनका लागि व्यवस्थित गर्ने प्रयासमै लागिरहेको बताए । लक्ष्य र योजनाअनुसार संख्यात्मक भन्दापनि गुणात्मक वृद्धि गर्ने प्रयासमा रहेको बताए ।
उनले अदालत र कानुनका केही सिमितताका कारण चाहेअनुसारका फैसला हुन नसक्ने बताए ।