बर्दिया – विप्लव नेकपाका कार्यकर्तालाई पक्राउ गर्ने क्रममा बर्दियामा एकजना प्रहरीलाई आफैले बोकेको बन्दुक पड्केर गोली लागेको छ ।
विप्लवका कार्यकर्ताहरु एनसेल टावर हान्न आएका छन् भन्ने विशेष सूचना पाएपछि पुगेको प्रहरीले विप्लवका कार्यकर्तालाई समात्दा आफैसँग भएको बन्दुक पड्किदा प्रहरी जवान गंगाराम चौधरी घाइते भएका हुन् ।
‘विप्लवका कार्यकर्तालाई समाते । उ भाग्न खोज्दा बल प्रयोग भयो । त्यही बेलामा आफूसँग भएको बन्दुक पड्किदा प्रहरी जवान चौधरी घाइते भए'- बर्दियाका एसपी राजेशनाथ बास्तोलाले भने ।
दाहिने खुट्टामा गोली लागेका चौधरी खतरामुक्त छन् । चौधरीको भेरी अस्पताल, नेपालगञ्जमा उपचार भइरहेको छ । घाइते चौधरीका अनुसार, विप्लवका कार्यकर्ताहरु आएको थाहा पाएपछि तीन वटा मोटरसाइकलमा ६ जना प्रहरी मधुवन नगरपालिका–४ को नहर आसपासमा पुगेका थिए । विप्लव नेकपाका चार जना दुई वटा मोटरसाइकलमा थिए ।
'प्रहरी र उनीहरु नहर वारी र पारी भए । प्रहरी जवान चौधरीले एकजनालाई समाते । कार्यकर्ता भाग्न खोज्दा प्रहरीले बेस्सरी बल प्रयोग गरेर समातिरहे । त्यही बेलामा बन्दुक पड्कियो र चौधरीको साप्रामा लाग्यो ।'-प्रहरीको भनाई छ ।
प्रहरीले दुई जना विप्लव कार्यकर्तालाई पक्राउ गरेको छ । पक्राउ पर्नेमा जयबहादुर ठाडामगर र रोहितकुमार सुनार रहेका छन् । भेरी अस्पतालमा उपचार गराइरहेका चौधरीले दुई वटा मोटरसाइकलमा रहेका चार जनामध्ये एउटा मोटरसाइकलका एकजना र अर्को मोटरसाइकलका एक जना भागेको बताए ।