सुर्खेत । सुर्खेतमा टिप्परको ठक्करबाट एक युवकको मृत्युभएपछि सुर्खेत बजार दिनभर तनावग्रस्त भएको छ।
युवाको ज्यान गएपछि आफन्तले दिनभर ऐरिचौक र गौतम चोकमा टायर बालेर विरोध प्रदर्शन गरेका छन्। उनीहरुले दोषीलाई कारबाहीको माग गर्दै सडक ठप्प बनाए भने प्रहरीले उनीहरुमाथि अश्रु ग्यास समेत प्रहार गरेको छ।
प्रहरीले टिपर चालकलाई नियन्त्रणमा लिएको छ भने मृतक परिवारलाई शव बुझाउन छलफल भइरहेको जनाएको छ।
यसका साथै प्रहरी प्रशासनले तनावग्रस्त सुर्खेतमा साँझदेखि कर्फ्यूको तयारी गरेको छ। साँझ ६ बजेदेखि बिहान ६ बजेसम्म कर्फ्यूको तयारी गरिएको प्रशासनले जानकारी दिएको छ।
सुर्खेतको वीरेन्द्रनगर नगरपालिका–३ गौतमचोक नजिकै टिपरले किचेर कालीकोट महावै गाउँपालिका–३ सिमखेतका २१ वर्षीय केशरबहादुर सिंहको ज्यान गएको थियो। भे १ प २१७८ नम्बरको मोटरसाइकललाई भे १ ख २२४२ को टिपरले ठक्कर दिएको थियो।