बुटवल - पूर्वी र पश्चिम नवलपरासीमा रहेका एनसेलका ३ वटा टावरमा अज्ञात व्यक्तिले आगजनी गरेका छन् । दुई जिल्लामा आइतबार राती आगजनी भएको हो ।
पूर्वी नवलपरासीको बौदीकाली गाउँपालिका–२ को कोटथरमौला र कावासोती नगरपालिका–१७ बुनौलीमा रहेका एनसेल टावरमा आगजनी भएको जिल्ला प्रहरी कार्यालय नवलपुरका निरीक्षक एंव सूचना अधिकृत गणेश बहादुर नराल क्षेत्रीले जानकारी दिए ।
टावरमा आगजनी भएको खबर पाएपछि प्रहरीको टोली त्यस स्थानमा पुगेको थियो ।
एनसेल टावर रहेको कम्पाण्डको ताला फोडेर आगजनी गरिएको हो । जुटको बोरामा मट्टितेल राखेर गरेको आगजनीबाट जेनेटर र मेशिनमा क्षति पुगेको प्रहरी निरीक्षक क्षेत्रीले बताए ।
स्थानीयको सहयोगमा आगो निभाएकाले थप क्षति हुन नपाएको उनले जानकारी दिए । त्यसैगरी पश्चिम नवलपरासीको रामग्राम नगरपालिका–९ करमैनीस्थित एनसेलका टावरमा आगजनी भएको जिल्ला प्रहरी कार्यालयका उपरीक्षक लालमणि आचार्यले जानकारी दिए । आगजनीबाट तारहरु जलेका छन् ।
आगजनी गर्ने व्यक्तिहरुको खोजी भइरहेको प्रहरीले जनाएको छ । आगजनी विप्लव समूहले गरेको हुन सक्ने आशंका प्रहरीको छ ।