भैरहवा–रुपन्देहीमा बुधबार ४७ जनामा मात्र कोरोना भाइरस संक्रमण पुष्टि भएको छ। पछिल्लो २४ घण्टामा थपिएका संक्रमितसँगै जिल्लामा संक्रमितको संख्या दुइ हजार ६ सय ११ पुगेको छ। बुधबार २८ जना संक्रमणमुक्त भएका छन्।
विभिन्न ल्याबमा गरिएका परिक्षण अनुसार शुक्रबार साँझ ५ बजेसम्म विभिन्न ७ पालिकामा १२ महिला र ३५ पुरुष कोरोना भाइरस कोभिड–१९ संक्रमित थपिएको स्वास्थ्य कार्यालय रुपन्देहीका भेक्टर कन्ट्रोल निरीक्षक तथा कोभिड फोकल पर्सन केदारनाथ शाहले लुम्बिनी टाइम्सलाई जानकारी दिए।
शाहका अनुसार सबैभन्दा बढी बुटवल उपमहानगरपालिकामा ७ महिला ११ पुरुष गरी १८ जनामा संक्रमण देखिएको छ। त्यस्तै सिद्धार्थनगरमा ८ जना, तिलोत्तमामा १३ जना, सैनामैनामा ३ जना, देवदह र शुद्धोधनमा २/२ जना र सियारीमा १ जनामा संक्रमण पुष्टि भएको छ।
कार्यालयका अनुसार हालसम्म संक्रमण भएकामध्ये २४ जनाको मृत्यु भएको छ। जिल्लाका विभिन्न क्षेत्रबाट १९३२ जना निको भएर फर्किसकेका छन् भने ६५५ जना सक्रिय संक्रमित विभिन्न आइशोलेशनमा उपचाररत छन्।