धरान-वीपी कोइराला स्वास्थ्य विज्ञान प्रतिष्ठान धरानको कोभिड १९ अस्पतालमा उपचाररत एक कोरोना संक्रमितको मृत्यु भएको छ ।
धरान १५ निवासी ६७ बर्षीय वृद्धको मध्याह्न सवा १२ बजे निधन भएको प्रतिष्ठानले जनाएको छ । सिकिस्त अवस्था भएर ती संक्रमितलाई भेन्टिलेटरमा राखेर उपचार भइहेको थियो भने हिजो (शुक्रबार) राती मात्र उनलाई प्लाज्मा थेरापी विधिबाट उपचार गरिएको थियो । ‘उहाँको अवस्था एकदमै सिकिस्त थियो, आज मध्याह्न सवा १२ बजे निधन भएको छ,’प्रवक्ता डा.निदेश सापकोटाले भने ।
उनलाई एक सातादेखि अत्यधिक खोकी, श्वासप्रश्वास फेर्न समस्या र ज्वरो आएको थियो । उनी उच्च रक्तचापको दीर्घ रोगी पनि भएको प्रवक्ता डा.सापकोटाले जानकारी दिए । सिकिस्त अवस्था हुदै गएपछि ३ दिनदेखि प्लाज्मा दाता खोजी गरेर हिजो शुक्रबार राती मृतकलाई प्लाज्मा दिइएको थियो । उनी वीपीमा प्लाज्मा थेरापी उपचार गरिएका दोस्रो संक्रमित व्यक्ति हुन् । यसअघि धरान ८ का एक व्यक्तिलाई पनि प्लाज्मा दिइएको थियो । उनको भने स्वास्थ्य सुधारोन्मुख रहेको बताइएको छ ।
प्रतिष्ठानका मेडिसिन विभागका प्रमुख एवं प्लाज्मा थेरापी उपचारको लागि सरकारद्वारा गठित उच्चस्तरीय समितिका सदस्य प्रा.डा.सञ्जिव शर्माले मृतक सिकिस्त अवस्था भएर नै प्लाज्मा थेरापी गरिएको बताए ।
उनको साउन २७ गते पिसिआर पोजेटिभ रिपोर्ट आएको थियो । उनलाई सोही दिन अस्पताल भर्ना गरिएको थियो ।