बुटवल । प्रेस चौतारी नेपालको २६औं स्थापना दिवसको अवसरमा रुपन्देही शाखाले रक्तदान कार्यक्रम गरेको छ । एक कार्यक्रमका बिच सोमबार केन्द्रीय सचिव प्रदिप आचार्यले जिल्ला शाखाका अध्यक्ष लक्ष्मण पौडेललाई ब्लड ब्याग हस्तान्तरण गरी उद्घाटन गर्नुभएको थियो ।
सोही अवसरमा बोल्दै केन्द्रीय सचिव आचार्यले पत्रकार हकहितसँग सामाजिक उत्तरदायित्वमा अग्रसर रहेको प्रेस चौतारी नेपाल आफ्नो स्थापना दिवसमा देशभर नै रक्तदानको अभियानलाई अघि बढाएको बताउनुभयो ।
कार्यक्रममा नेपाल स्वयंसेवी रक्तदाता समाजका केन्द्रीय महासचिव तथा जिल्ला अध्यक्ष कृष्ण चौहानले रगत र रक्तदानको महत्वबारे प्रकाश पार्नुभयो । पछिल्लो समय पत्रकारहरुसमेत रक्तदानमा अग्रसर हुँदा रक्तदानका समाचारमा प्राथमिकता पाउन थालेको उहाँले बताउनुभयो । प्रत्येक ३–३ महिनामा शरीरमा खेर जाने रगत तत्वलाई दान गर्दा बिरामीहरुको ज्यान जोगाउन सकिने उहाँले बताउनुभयो । रगत दान सबैभन्दा पुण्य कार्यसमेत भएको उहाँले बताउनुभयो ।
कार्यक्रममा अध्यक्ष लक्ष्मण पौडेलले सामाजिक उत्तरदायित्वमा पत्रकार अघि बढ्न प्रेरणा मिल्ने गरी कार्यक्रम गरिएको बताउनुभयो । रक्तदान अभियानमा संस्थागत रुपमा जोडिएर काम गर्दै आएको उहाँले बताउनुभयो । कार्यक्रममा सल्लाहकार दिनेश पाण्डे, इन्दिरा अर्याल, आरपी आचार्य, प्रदेश सदस्य मनिष पन्त, खेलकुद पत्रकार मञ्चका अध्यक्ष सुमन अधिकारी, राष्ट्रिय युवा संघ रुपन्देही जिल्ला अध्यक्ष विकासजंग बस्नेत, मानव अधिकार तथा शान्ति समाजका सभापति कृष्ण भट्टराई, रक्तसञ्चार सेवा केन्द्रका निरञ्जन राजभण्डारीले सामाजिक कार्यमा सबै संघसंस्थाहरु लाग्नुपर्ने बताउनुभयो ।
नेपाल रेडक्रस सोसाइटी, रक्तसञ्चार सेवा केन्द्र बुटवलको प्राविधिक सहयोगमा गरिएको रक्तदान कार्यक्रममा ४० युनिट रगत संकलन भएको संयोजक स्वस्तिक श्रेष्ठले जानकारी दिनुभयो ।
