सुनसरी-कोरोनाभाइरसको महामारी फैलिएको धरानमा संक्रमित र अन्य बिरामीको उपचार गर्न छाडेर विशेषज्ञ चिकित्सकहरु काठमाडौं गएका छन्। बीपी कोइराला स्वास्थ्य विज्ञान प्रतिष्ठान धरानको ‘ओपीडी’ सेवा बन्द गरेर चिकित्सकहरु काठमाडौं गएपछि हजारौं बिरामी उपचार गराउनबाट वञ्चित भएका छन्।
सरकारले सभा, सम्मेलन र भिडभाड हुनेगरी कुनैपनि कार्यक्रम गर्न प्रतिबन्ध लगाएको भएपनि बीपी कोइराला स्वास्थ्य विज्ञान प्रतिष्ठान धरानले साउन ३० गते सिनेट बैठक बोलाएको छ।
सिनेट बैठकमा भाग लिनका लागि भन्दै प्रतिष्ठानको ओपीडी सेवा बन्द गरेर प्रतिष्ठानका डेढ दर्जन चिकित्सकहरु काठमाडौं गएका हुन्। प्रतिष्ठानका पदाधिकारीहरु उपकुलपति डा. ज्ञानेन्द्र गिरी, शिक्षाध्यक्ष डा. गुरु खनाल, रजिष्ट्रार डा. मोहनचन्द्र रेग्मी र निर्देशक गौरीशंकर साहलगायतका डेढ दर्जन चिकित्सक काठमाडौं गएका हुन् ।
चिकित्सकहरुले ओपीडी सेवा बन्द गरेर काठमाडौं हिँडेपछि प्रतिष्ठान आउने हजारौं सर्वसाधारणको उपचार सेवा प्रभावित भएको छ। प्रतिष्ठानका पदाधिकारीसहित दर्जनौं चिकित्सकहरुले कोरोना संक्रमित र अन्य बिरामीको उपचार गर्न छाडेर जानु गैरजिम्मेवारीपन देखाएको धरान उपमहानगरपालिकाका मेयर तिलक राईले बताए।
सिनेट बैठक बोलाएपछि कोरोनाको महामारी जारी रहेकाले तत्काल स्थगित गर्न स्वास्थ्यमन्त्री भानुभक्त ढकाललाई लिखित आग्रह गरेपनि अटेर गरिएको मेयर राईको गुनाासो छ।
हाल बीपी प्रतिष्ठानमा १०० जनाभन्दा बढी विशेषज्ञ चिकित्सकहरु रहेका छन्। अस्पतालले आकस्मिक सेवा भने दिइरहेको छ।
प्रतिष्ठानले कोरोना संक्रमितलाई भर्ना नगरेका कारण धरानका १८ संक्रमितहरु घरमै छन्। यसले समुदायमा अझ संक्रमण फैलाउने त्रास बढेको छ।