बुटवल-नेकपा बुटवल नगर कमिटी सचिवालय सदस्य जीतबहादुर मल्ल सहित २ सय १८ जना नेपाली कांग्रेसमा प्रवेश गरेका छन्। १ सय २२ जना संगठीत सदस्य र ९६ जना साधारण सदस्य आफ्नो पार्टीमा प्रवेश गरेको कांग्रेसले जनाएको छ।
बुधबार आयोजित एक कार्यक्रममा कांग्रेस रुपन्देहीका जिल्ला सभापति अब्दुल रज्जाकले पार्टी प्रवेश गराउँदै कम्युनिष्ट पार्टीले दुईतिहाई बहुमत हुँदा पनि जनताको पक्षमा कुनैपनि काम गर्न नसकेको बताए।
मल्ल पार्टी एकीकरण हुनु अगाडि तत्कालीन नेकपा एमालेको बुटवल नगर उपाध्यक्ष थिए। पार्टी प्रवेश कार्यक्रम अघि विज्ञप्ती जारी गरी उनले आफू सहित २१८ जनाले पार्टी परित्याग गरेको बताएका थिए।
नेकपा बुटवल नगर समितिले विज्ञप्ती जारी गरी जीतबहादुर मल्ललाई पार्टीको नगर कमिटि सदस्य र संगठित सदस्यबाट समेत निस्कासन गरेको जानकारी गराएको छ।
नगर कमिटी अध्यक्ष बाबुराम पन्थीले विज्ञप्ती मार्फत गम्भीर प्रकारको अनुशासन उल्लंघन गरेको भन्दै पार्टी विधानको धारा ५६ को उपधारा १० बमोजिम कारवाही गरेको जनाएका छन्।