पाल्पा-पाल्पामा जीप दुर्घटना हुँदा २ जनाको मृत्यु भएको छ। निस्दी गाउँपालिकामा भएको जीप दुर्घटनामा निस्दी–५ डब्बुडाँडाका ६३ वर्षीय ठाकुर प्रसाद थाल र निस्दी–४ काफलडाँडाकी बिष्णु माया सारूकी ३ महिनाको छोरी सिमोबन कालुङको मृत्यु भएको हो।
निस्दी– ५ पटाकसरस्थित कच्ची सडकखण्डमा मोटेखर्कबाट पटाकसरतर्फ जाँदै गरेको लु १ ज २८८७ नम्बरको जिप सोमबार साँझ अनियन्त्रित भई बाटोबाट अन्दाजी ७०० मिटर तल खसेर दुर्घटना भएको थियो। दुर्घटनामा अन्य ६ जना घाइते भएका छन् ।
घाइतेमध्ये निस्दी ५ पटाकसरकी ३७ वर्षीया सुमित्रा सारु र ३६ वर्षीया शेरमति सारूको अवस्था गम्भीर रहेको प्रदेश ५ ट्राफिक प्रहरी कार्यालय बुटवलले जनाएको छ।
दुर्घटनामा निस्दी ३ की विष्णुमाया सारू, निस्दी ५ की लक्ष्मी सारू, सोही ठाउँकी तिल कुमारी सारू र निस्दी ४ झ्यालटुङकी श्रृजना गैरे घाइते घाइते भएका छन्।
घाइते सबैलाई उपचारका लागि लुम्बिनी प्रादेशिक अस्पताल बुटवल ल्याइएको छ।