बुटवल-रुपन्देहीको देवदह नगरपालिकामा थप एक जना बैंकका कर्मचारीलाई कोरोना भाइरसको संक्रमण देखिएपछि उनका आफन्त र सम्पर्कमा आएकाहरुको आज पीसीआर परिक्षणको लागि स्वाब संकलन गरिएको छ।
देवदहको खैरेनीमा रहेको गरिमा विकास बैंकका कर्मचारीमा मंगलबार कोरोना संक्रमण देखिएपछि उनको सम्पर्कमा आएका २५ जनाको पिसिआर गरिएको थियो। त्यसरी पिसिआर परिक्षण गर्दा शनिबार साँझ सोही बैंकका थप एक कर्मचारीमा कोरोना पोजेटिभ देखिएको थियो।
तिलोत्तमा ३ मा घर भएका उनी देबदहको गरिमा विकास बैंकमा काम गर्दथे। कोरोना संक्रमण देखिएपछि देवदह र तिलोत्तमा दुबै ठाउँमा गरी पिसिआर परीक्षणको लागि आज २० जनाको स्वाब संकलन गरिएको छ।
देवदहमा १३ जनाको र तिलोत्तमामा ७ जनाको स्वाब संकलन गरिएको हो। संक्रमित बैंक कर्मचारीलाई नगरपालिकाकै आइसोलेसनमा राखिएको र परिवारसहित ७ जनाको पिसीआर परिक्षण गरिने तिलोत्तमा नगरपालिकाका जनस्वास्थ्य अधिकृत इश्वरी पौडेलले बताए।