बुटवल-रुपन्देहीका नेपाल कम्युनिष्ट पार्टी (नेकपा) बाट निर्वाचित स्थानीय तहका जनप्रतिनिधिहरुले पार्टी केन्द्रमा देखिएको विवादप्रति आफूहरुको गम्भीर ध्यानाकर्षण भएको जनाएका छन् ।
आज नेकपाबाट निर्वाचित रुपन्देहीका स्थानीय सरकारका प्रमुख, उपप्रमुख तथा अध्यक्ष, उपाध्यक्षहरुको मणिग्राममा सम्पन्न बैठकले पार्टी केन्द्रमा देखिएको विवादप्रति सामूहिक धारणा बनाउँदै पार्टी नेतृत्वलाई एकताबद्ध भएर अघि बढ्न आग्रह गरेको छ ।
तिलोत्तमा नगर प्रमुख बासुदेव घिमिरेको अध्यक्षतामा सम्पन्न बैठकमा बुटवल, तिलोत्तमा, सैनामैना, सिद्धार्थनगर, ओमसतिया, सियारी, शुद्धोधन र कञ्चनका प्रमुख, उपप्रमुख तथा अध्यक्ष, उपाध्यक्षहरुको सहभागिता थियो । बैठकबाट उनीहरुले आफूहरु टुटफुट होइन एकताबद्ध नेपाल कम्युनिष्ट पार्टी (नेकपा) को पक्षमा रहेको बताउँदै स्थानीय जनताको सेवामा समर्पित हुने र सिंगो जनताको समृद्धि प्राप्तिको लागि एक ठाउँमा उभिने निर्णय गरेका छन् ।
जनताको अभिमत, कार्यकर्ताको अपेक्षा र राष्ट्रको आवश्यकता अनुसार पार्टी नेतृत्व एकताबद्ध भई जनतामा सकारात्मक सन्देश पुर्याउन जनप्रतिनिधिहरुले नेतृत्वलाई आग्रह गरेका छन् ।
नेपाली जनताले संघीय, प्रदेश र स्थानीय सरकारलाई नेपाली जनताले भारी जनमत दिएको अवस्थामा तीनै तहका सरकार र पार्टीको नेतृत्वमा विकास र समृद्धि प्राप्त गर्दै समाजवादको आधार तय गर्ने र सुखी नेपाली : समृद्ध नेपाल निर्माण गर्ने दृढ चाहना सबैको रहेको उनीहरुको सामूहिक धारणा छ । यसलाई पूरा गर्नको लागि बलियो पार्टी र बलियो सरकार अहिलेको आवश्यकता रहेको उनीहरुको ठहर छ ।
जनप्रतिनिधिहरुले पार्टी एकताको मर्म र भावनाअनुसार अगाडि बढ्दै विधि विधान र संस्थागत निर्णय सहित अगाडि बढ्दै कार्यकर्ता र नेपाली जनताको अपेक्षालाई पूरा गर्न पार्टी केन्द्रको गम्भीर ध्यानाकर्षण गराएका छन् ।