बुटवल–रुपन्देहीको तिलोत्तमा नगरपालिकामा खुल्ला व्यायामशाला निर्माण हुने भएका छन् । बढ्दो सहरीकरणसँगै खुला ठाउँको अभाव भैरहेको बेला तिलोत्तमाले नागरिकलाई स्वस्थ बनाउन खुल्ला व्यायामशालाको अवधारणा ल्याएको हो । केही दिनभित्र वडा नं. ८ दीपनगर चोकमा पहिलो खुल्ला व्यायामशाला निर्माण हुनेछ भने अन्य स्थानमा क्रमशः निर्माण गरिने नगरपालिकाले जनाएको छ ।
दीपनगरमा निर्माण हुने व्यायामशालाका लागि आवश्यक सामग्री तथा उपकरणहरु आयुर्वेद तथा वैकल्पिक चिकित्सा विभागले नगरपालिकालाई उपलब्ध गराएको छ । विभागका महानिर्देशक डा. वासुदेव उपाध्यायले शनिबार तिलोत्तमा नगर प्रमुख वासुदेव घिमिरेलाई व्यायमशालामा आवश्यक सामाग्री हस्तान्तरण गरे ।
शारीरिक व्यायमको लागि चाहिने एक सेट उपकरणको मूल्य दश लाख रहेको जनाइएको छ ।
विभागबाट प्राप्त सामग्रीलाई तोकिएबमोजिम व्यवस्थित तरिकाले जडान गरेर दीपनगरमा व्यायामशाला सञ्चालनमा ल्याइने नगर प्रमुख घिमिरेले बताए ।
शनिबार ती सामग्रीको व्यायमशाला बन्ने स्थानमा प्रदर्शन समेत गरिएको छ । तिलोत्तमा नगरपालिकाले आर्थिक वर्ष २०७७/७८ मा अन्य स्थानमा समेत खुल्ला व्यायामशाला बनाउने नीति तथा कार्यक्रममा उल्लेख गरेको छ ।
सामग्री हस्तान्तरण गर्दै विभागका महानिर्देशक उपाध्यायले स्वस्थ जीवनको लागि शारीरिक व्यायामको भूमिका महत्वपूर्ण हुने भएकोले नगरपालिकालाई सामाग्री सहयोग गरिएको बताए । उनले व्यायामशालाको भरपूर उपयोग गरी स्वास्थ्यमा सुधार ल्याउन स्थानीयलाई आग्रह गरे ।
प्रमुख वासुदेव घिमिरेले स्वस्थ नागरिक निर्माणको लागि नगरले खुल्ला व्यायमशालाको अवधारण अगाडि बढाएको बताउँदै आगामी आर्थिक वर्षको बजेटमा कृषि र स्वास्थ्यलाई प्राथमिकतामा राखिएको बताए ।
स्वस्थ जीवनशैलीको लागि व्यायामशाला अब टोल/टोलमा हुनुपर्ने बताउँदै उनले टोल विकास संस्थाले व्यवशालाको व्यवस्थापन तथा रेखदेख गर्नुपर्ने बताए ।
जनभावना माध्यामिक विद्यालय नजिकैको खुला स्थानमा निर्माण गरिने व्यायामशालामा एक पटकमा दश जनाले व्यायाम गर्न सक्नेछन् ।
नगर उपप्रमुख जागेश्वरी चौधरीले खानपान र जीवनशैलीमा आएको परिवर्तनले व्यक्तिमा विभिन्न प्रकारका नसर्ने रोग बढेको बताउँदै स्वस्थ जीवनशैलीको लागि व्यायामशालाको महत्व अझै बढेको बताइन् । उनले व्यायामशाला निर्माणले नियमित शारीरिक अभ्यास गर्न चाहने जो कोहीलाई सहज हुने बताइन् ।