बुटवल । नेकपा एमाले रूपन्देहीको १० औं जिल्ला अधिवेशन बुधबारदेखि भैरहवामा सुरू हुँदैछ । पार्टी प्रचार विभाग रूपन्देहीले अधिवेशनको तयारी पूरा भएको मंगलबार पत्रकार सम्मेलन गरी जानकारी दिएको हो । भैरहवाको पाँचतारे सिद्धार्थ भिलासा होटल हुने अधिवेशनको पार्टी अध्यक्ष केपी शर्मा ओलीले उद्घाटन गर्ने कार्यक्रम रहेको छ ।
पार्टी अध्यक्ष तेजेन्द्र केसीले तराईमा बढ्दो गर्मीको कारण आफूहरूले फाइभस्टार होटलमा कार्यक्रम राखिएको बताउनुभयो । अधिवेशनमा अध्यक्ष ओलीसँगै उपाध्यक्ष विष्णु पौडेल, सचिव छविलाल विश्वकर्मा, प्रदेश इन्चार्ज पद्मा अर्याल, पूर्व मुख्यमन्त्री लिला गिरी लगायतका नेताहरु सहभागी हुनेछन् ।
जिल्लाका १६ वटा पालिकाका १५५ वडा र २३ जनसंगठन र आयोजक कमिटीबाट गरी ८५३ जना प्रतिनिधि चयन भइसकेका छन् । पार्टी नेतृत्वका लागि अहिलेसम्म वर्तमान अध्यक्ष तेजेन्द्र केसी, सचिव यज्ञ गैरे र सहसचिव चित्रबहादुर कार्की प्रतिस्पर्धामा हुनुहुन्छ । नेतृत्व चयन गर्न अहिलेसम्म एमाले रुपन्देहीमा निर्वाचन भने भएको छैन । एमाले प्रचार विभाग प्रमुख हितराज पन्थीका अनुसार रूपन्देहीका पार्टीका १७ हजार संगठित सदस्य रहेका छन् ।
अधिवेशनबाट नेतृत्वमा को आउँछ भन्ने विषय एमालेको तल्लो तहसम्म बहसमा छ । रुपन्देहीमा एमालेको नेतृत्व चयनका लागि अहिलेसम्मको चुनाव भएको छैन । एमालेको मिसन–०८४ को केन्द्रित अधिवेशन भएकाले पनि यसलाई महत्वपूर्ण रूपमा लिइएको नेताहरूले बताएका छन् । अध्यक्ष केसीले आफू एकपटक दोहोरिएर पार्टीलाई गतिशील बनाउने बताउनुभयो ।
सचिव तथा अध्यक्षका अर्का दाबेदार गैरेले आफू अध्यक्षभन्दा अरू सोच्नसक्ने अवस्थामा नरहेको बताउनुभयो । आफू नेतृत्वमा आएमा कार्यकर्ताको दूरी सुमधुर बनाउँदै पार्टीलाई सुस्त रहेको पार्टीलाई चलाएमान बनाउने गैरेले दाबी गर्नुभयो । त्यस्तै कार्कीले आफू नेतृत्वको लागि प्रमुख दावेदारी रहेको स्पष्ट पार्नुभयो ।