बुटवल । रुपन्देही क्षेत्र नं २ का मतदाताले विकास र समृद्धिमा प्रतिवद्ध दलका उम्मेदवारलाई भोट दिने बताएका छन् ।
आज बुटवल वडा नं १३ को नागरिक टोल तथा जवइ क्षेत्रमा घरदैलोमा पुगेका एमाले क्षेत्र नं २(२) का उम्मेदवार भोजप्रसाद श्रेष्ठसँग मतदाताले विकास र समृद्धिको एजेण्डा एमालेले उठाएका कारण अरु दललाई भोट हाल्न नसक्ने बताए । पार्टीप्रति गुनासा भए पनि एमाले छोड्न नसक्ने उनिहरुको भनाइ थियो ।
जिल्लामा धेरै योजनाहरु एमाले सरकारकै पालामा आएका कारण एमालेको विकल्प नभएको नागरिकटोलका नारायण मरासिनीले बताउनुभयो । “तिनाउ दानव करिडोरले बिस्थापित हुन्छौ की भन्ने डर थियो तर विकल्प विना नहटाउने भए पछि अब ढुक्क भएका छौँ”, स्थानीयमरासिनीले भन्नुभयो ।
घरदैलोका क्रममा सो क्षेत्रका बासिन्दाले तिनाउ नदी करिडोरमा पर्ने स्थानीयलाई व्यवस्थापन गरेर मात्र आयोजना निर्माणको काम अघि बढाउन आग्रह गरेका थिए ।
जवाफमा श्रेष्ठले स्थानीयलाई उचित स्थानमा आवासमा व्यवस्थापन गरेर मात्रै करिडोर निर्माणको काम अघि बढाउने विश्वास दिलाउनुभयो । उहाँले विरोधीले फैलाएको हल्लाका पछाडि नलाग्न आग्रह गर्नुभयो । आफ्नो क्षेत्रका जनताको मन दुखाएर कुनै काम अगाडि नबढाउने उहाँको प्रतिवद्धता थियो ।
तिनाउ दानव करिडोर निर्माणले त्रसिएका स्थानीयहरु विकल्प विना काम अघि नबढ्ने आश्वासन पाएपछि खुशी भएको स्थानीय सिता थापा खड्काले बताउनुभयो ।
जवइमा भएको घरदैलोका क्रममा स्थानीयले बुटवल वारि र पारीको विभेद हटाउन यो क्षेत्रमा पनि विकास र पूर्वाधार निर्माणका योजना भित्र्याउन आग्रह गरे । “हामि जिताउँछौ तर विकासमा यो क्षेत्र पछि पर्नु हुदैन”, स्थानीय पूर्णबहादुर थापाले भन्नुभयो ।
उम्मेदवार श्रेष्ठले मुख्य सडकको स्तरोन्नती तथा अन्य विकास निर्माणका कामले अब बुटवल वारि र पारीको विभेद हट्ने बताउनुभयो । यो क्षेत्रमा जनताको सुझावका आधारमा विकासका काम अघि बढाउने उहाँको भनाइ थियो ।
नेता श्रेष्ठले समग्र देशको विकास समृद्धिका लागि मंसिर ४ गतेको निर्वाचनमा सूर्य चिन्हमा मत हालेर एमाले उम्मेदवारलाई विजयी बनाउन अनुरोध गर्नुभयो ।