बुटवल । लुम्बिनी प्रदेशका पूर्वमन्त्री एवं नेकपा एमालेको तर्फबाट रुपन्देही क्षेत्र नं. २ (१) का उम्मेदवार लिला गिरीले यस क्षेत्रका उद्योगहरुमा लगाइएको डिमान्ड चार्ज छुट गर्ने बताउनुभएको छ।
आज तिलोत्तमा ३ को घरदैलो अभियान कार्यक्रममा बोल्दै नेता गिरीले एमाले नेतृत्वको सरकार निर्माणपछि उद्योगहरुलाई डिमान्ड चार्जमा छुट दिने र माग अनुसारको प्रयाप्त विजुली उपलब्ध गराइने बताउनुभयो ।
यस क्षेत्रका उद्योगीहरुले बारम्बार डिमान्ड चार्ज छुट दिन माग गरेपनि सरकार गम्भिर नबनेको भन्दै एमाले सरकारमा पुगेपछि उद्योगीका सवै समस्या समाधान गर्ने बताउनुभयो । सरकारले लकडाउन अवधिको डिमाण्ड चार्ज शतप्रतिशत र महशुलमा छुट नदिएको भन्दै रुपन्देही उद्योग संघ, उद्योग बाणिज्य संघलगाएतका संघसंस्थाले विद्युत प्राधिकरणलाई ज्ञापन पत्रसमेत बुझाएका छन् ।
‘यो सरकार बनेको जनताको काम गर्न होइन, भागबण्डामा कसलाई कहाँ राख्ने भन्नेमा मात्र ध्यान हुँदा उद्योगीका समस्या ज्यूका त्यहि छ । त्यो समस्यालाई हामीले समाधान गर्नेछांै ।’ उहाँले भन्नुभयो ।
साथै उहाँले अहिले कतिपय ठाउँमा विद्युत अपुग हुँदा उद्योग सञ्चालनमा कठिनाई भएकाले प्रयाप्त विद्युत उपलब्ध उद्योगीलाई गराउने बताउनुभयो । ट्रिपिङ समस्या, कच्चा पद्धार्थ आयातमा छुट र निर्यातलाई प्रोत्साहन गर्ने एमालेको निती नै भएको उहाँको भनाइ छ ।
साथै उहाँले बुटवलको औद्योगिक क्षेत्रलाई आधुनिक पूर्वाधारयुक्त बनाउने, उद्योगीहरुको समन्व्यमा बर्दघाटदेखि शिवराजसम्म र त्रिवेणीदेखि कृष्णनगर सम्मका उपयुक्त स्थानमा ठूला उद्योग सञ्चालनका लागि जग्गाको पहिचान गरी पूर्वाधार बनाउनेतर्फ जोड दिइने बताउनुभयो ।
घरदैलोमा हिंडेका गिरीलाई मतदाताले सडक निर्माणका साथै अव्यवस्थित बसोबासीहरुको समस्या समाधान गर्न आग्रह गरेका थिए । साथै उनीहरुले तिनाउ दानव कोरिडोरमा पर्ने घरधनीहरुलाई व्यवस्थापन गर्न आग्रह गरे । मतदाताको गुनासो सुनेपछि नेता गिरीले तिनाउ दानव करिडोरको काम त्यहाँका जनतालाई अनेत्र व्यवस्थापन गरेर मात्र योजना अगाडि बढ्ने बताउनुभयो ।
अव्यवस्थित बसोबासीहरुको सन्दर्भमा निर्वाचनमा विजयी भएपछिको पहिलो कार्य अन्तर्गत अव्यवस्थित बसोबासी, भूमिहीनहरुका लागि व्यवस्थापन गर्ने रहेको उहाँले बताउनुभयो ।