बुटवल। लुम्बिनी प्रदेश सभाको आजको बैठकमा पनि प्रमुख प्रतिपक्षी दल नेकपा एमालेले अवरोध गरेको छ। निर्धारित समयभन्दा आधा घण्टा ढिलागरी सुरु भएको बैठकमा एमालेका सांसदले नाराबाजी गर्दै रोष्ट्रम घेराउ गरेका थिए।
एमालेका प्रदेश सभा सदस्य नारायण आचार्यले एमालेले कारबाही गरेका दुई सांसद पद मुक्त नहुँदासम्म सदन चल्न नदिने एमालेको अडान रहेको दोहोर्याएका थिए।
बैठकमा प्रदेश सभा सदस्यहरूले शून्य र विशेष समयमा बोल्ने, वन, वातावरण तथा भू-संरक्षणमन्त्री सुरेन्द्र बहादुर हमालबाट वन सम्बन्धमा व्यवस्था गर्न बनेको विधेयकमाथि र कृषि, खाद्य प्रविधि तथा भूमि व्यवस्थामन्त्री सुमन शर्मा रायमाझीबाट जीवनाशक विषादी नियमन सम्बन्धमा व्यवस्था गर्न बनेको विधेयक पेस भई निर्णयार्थ पेस हुने कार्यसूची रहेको थियो ।
अहिले लुम्बिनी प्रदेश सभाको बैठक आधाघण्टाका लागि स्थगित भएको छ ।