बुटवल-नेकपानिकट केही विद्यार्थीहरुले पार्टीमा देखिएको विवाद समाधान गर्न दबाबस्वरुप प्रदेश ५ को पार्टी कार्यालयमा धर्ना दिएका छन् ।
नेकपानिकट अनेरास्ववियुका केन्द्रीय सदस्य, जिल्ला सहसंयोजक र कार्यसमिति सदस्यहरुसमेतले बुटवलस्थित नेकपा प्रदेश ५ कार्यालयमा धर्ना दिएका हुन् । अनेरास्ववियु र राष्ट्रिय युवा संघले आह्वान गरेको भनिएको धर्ना कार्यक्रममा नेकपा अध्यक्ष तथा केपी शर्मा ओली पक्षधरका युवाहरु भने सहभागी थिएनन् ।
धर्नामा सहभागी युवाहरुले ‘ब्यक्ति होइन नीति, ब्यक्ति होइन पाटी’, ‘विधि पद्धति लागू गरौं, पार्टी एकता कायम गरौं’, ‘पार्टी एकता जिन्दावाद’ लगायतका नारा लेखेका प्ले कार्ड बोकेका थिए । उनीहरुले पार्टीभित्रको विवाद सहमतिमा टुंगो लगाउन, पार्टीमा देखिएको द्वन्द्व समाधान गर्न माग गर्दै प्रदेश ५ का पार्टी कमिटि सदस्य नन्दीकिशोर ढकाललाई ज्ञापन पत्र बुझाएका छन् ।
धर्ना कार्यक्रममा अनेरास्ववियु केन्द्रीय सदस्य अमित खड्का, अनुप पोखरेल, लक्ष्मी केसी, रुपेश पौडेल, रुपन्देही जिल्ला सहसंयोजक विष्णु खत्री, सदस्यहरु बिशाल पाण्डे, हिमाल खनाल लगायतका विद्यार्थीहरु सहभागी थिए । त्यस्तै नेकपाका युवा नेताहरु राजु गुरुङ, सरिता श्रीस, जितेन्द्र पुनलगायतको सहभागिता थियो ।
यसअघि पनि युवाहरुले बुटवलमा ओली नेतृत्वको सरकारलाई स्थायित्व दिनुपर्ने पक्षमा र भैरहवाको जिल्ला पार्टी कार्यालयमा ओलीइतरका युवाहरुले ओलीको एकपक्षीय प्रवृत्तिको अन्त्यको माग गर्दै धर्ना र प्रदर्शन गरेका थिए ।