नेपालगञ्ज–बाँकेमा कोरोना भाइरसको संक्रमणबाट मंगलबार राती एक ३७ वर्षीय पुरुषको मृत्यु भएको छ।
दुवै फोक्सोमा निमोनिया भएपछि शिक्षण अस्पताल नेपालगञ्जमा भर्ना भएका नेपालगञ्ज उपमहानगरपालिका वडा नं. १ निवासी ३७ वर्षीय पुरुषको राती १ बजेर ३० मिनेटमा मृत्यु भएको स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठले जानकारी दिए।
उनका अनुसार, स्वास प्रस्वासमा समस्या भएपछि भदौ ८ गते विहान १० बजे नेपालगञ्ज मेडिकल कलेजको शिक्षण अस्पताल नेपालगञ्जमा ती व्यक्तिलाई भर्ना गराईएको थियो। कोरोनाको लक्षण देखिएपछि स्वाब लिएर परीक्षण गर्दा सङ्क्रमण देखिएको थियो।
उपचारकै क्रममा स्वास्थ्य अवस्था बिग्रिदै गएपछि शिक्षण अस्पताल नेपालगञ्जबाट भेन्टिलेटरसहित शिक्षण अस्पताल कोहलपुर सारेर उपचार गर्दागर्दै गएराती १ः३० बजे मृत्यु भएको जिल्ला स्वास्थ्य कार्यालय, बाँकेका अधिकृत एवं कोरोना स्रोत व्यक्ति श्रेष्ठले बताए।
योसँगै बाँकेमा कोरोनाबाट मृत्यु हुनेको सङ्ख्या पाँच पुगेको छ। यसअघि नरैनापुर गाउँपालिका ५ निवासी २५ वर्षीय युवा, बैजनाथ गाउँपालिका ६ निवासी ४६ वर्षीया महिला, कोहलपुर नगरपालिका २ निवासी ७० वर्षीया महिला र नेपालगञ्ज ५ निवासी ६२ वर्षीय पुरुषको कोरोनाबाट मृत्यु भइसकेको छ।
बाँकेका प्रमुख जिल्ला अधिकारी रामबहादुर कुरुम्वाङले निधन प्रति दुःख व्यक्त गर्दै मृतकको घरपरिवार र नेपाली सेनासँगको समन्वयमा शव व्यवस्थापनको तयारी भईरहेको जानकारी दिए।