बुटवल । लुम्बिनी प्रदेशका स्वास्थ्य मन्त्री राजु खनालले लुम्बिनी प्रादेशिक अस्पताललाई पश्चिम क्षेत्रका जनताले सबै विशिष्टिकृत स्वास्थ्य उपचार प्राप्त गर्न सक्ने अस्पतालको रुपमा विकास गरिने बताउनुभएको छ । अस्पतालमा बन्न लागेको अत्याधुनिक संरचनासहितको १० तल्ले नयाँ भवन निर्माण समयमै सक्नुपर्नेमा जोड दिँदै उहाँले निर्माण कम्पनीबाट प्रतिबद्धताअनुसारको काम हुनेमा विश्वास व्यक्त गर्नुभयो ।
अस्पतालको ११४ औं वार्षिकोत्सवको अवसरमा मंगलबार आयोजित मूल समारोहलाई सम्बोधन गर्दै स्वास्थ्यमन्त्री खनालले लुम्बिनी प्रादेशिक अस्पताललाई प्रदेशको गौरवको योजनाअनुसार अगाडि बढाउने प्रयासअनुसार सरकारले काम गरिरहेको उल्लेख गर्नुभयो । ‘हाम्रा आवश्यकताहरु धेरै छन्, यसको गुणस्तर वृद्धि गरेर जान सकेनौं, जनशक्ति र उपकरण दिन सक्दैनौं भने जनताले चाहेको जस्तो उपचार सेवा उपलब्ध गराउन सक्दैनौं ।’ मन्त्री खनालले भन्नुभयो । आवश्यक स्रोत व्यवस्थापनका लागि सरकारले पहल गर्छ । अस्पताललाई साधन स्रोत र उपकरणको कमी हुन नदिने प्रतिबद्धता गर्दै मन्त्री खनालले नेपाली मात्र नभई विदेशीहरु समेत उपचार गर्न आउने थलोको रुपमा अस्पताललाई विकास गरिनुपर्नेमा जोड दिनुभयो । मन्त्री खनालले अस्पतालमा क्याथल्याबको समेत उद्घाटन गर्नुभएको छ ।
लुम्बिनी प्रदेशका पूर्वस्वास्थ्य मन्त्री सुदर्शन बरालले अस्पतालको विकासका लागि आफ्नो पालामै गुरुयोजना तयार भएर काम अघि बढेको बताउँदै विगतका प्रतिवद्धता सरकारले पालना गर्नुपर्नेमा जोड दिनुभयो । अस्पतालको नियमित आर्थिक स्रोतको रुपमा रहेको व्यवसायिक सटरहरु भत्काएर गुरुयोजनाअनुसार काम अघि बढेको अवस्थामा त्यसबापतको शोधभर्ना प्रदेश सरकारले उपलब्ध गराउनुपर्ने बताउनुभयो । आफू मन्त्री हुँदासम्म अस्पतालले शोधभर्नाबापत पाउनुपर्ने वार्षिक ६ करोड आर्थिक अनुदान उपलब्ध गराउँदै आएको भएपनि हाल आएर उक्त रकम रोकिनु गलत भएको उल्लेख गर्नुभयो ।
कार्यक्रममा बोल्दै लुम्बिनी प्रदेश सरकारका मुख्यन्यायधिवक्ता बुद्धबहादुर थापा, बुटवल उपमहानगरका प्रमुख खेलराज पाण्डेय, लुम्बिनी प्रदेशका स्वास्थ्य सचिव डा. जनार्दन पन्थीलगायतले अस्पतालमा बन्ने १० तले नयाँ भवनको काम समयमै सम्पन्न गर्नुपर्नेमा जोड दिनुभयो । अस्पतालप्रति जनताको चासो, भरोसा र आकर्षण बढी रहेका कारण सोहीअनुसार गुनासो र प्रतिक्रियाहरु आउनु स्वभाविक भएको उल्लेख गर्दै सकेसम्म गुनासो नआउनेगरी सेवा प्रवाह गर्न सुझाव दिनुभयो ।
अस्पतालका मेडिकल सुपेरिटेन्डेन डा. सुदर्शन थापाले स्वागतसहित वार्षिक प्रतिवेदन प्रस्तुत गर्नुभयो । अस्पतालले चालू आर्थिक वर्षमा मात्रै करिब डेढ दर्जन बढी सेवा बिस्तार गरेको उहाँले बताउनुभयो । १५ बेड क्षमताको एसएनसीयू स्थापना, ६ बेड क्षमताको पीआईसियू स्थापना, ८ बेडको एनआईसीयूलाई १२ बेडमा बिस्तार, बर्थिङ सेन्टर स्थापना, क्याथल्याव संचालन, इन्टेरेस्कोप सञ्चालन, बालउद्यान स्थापनालगायतका उपब्धि बारे मेसु थापाले जानकारी गराउनुभयो । यसैगरी निकट भविष्यमै अनलाइन टिकटको समेत व्यवस्था गरिने उल्लेख गर्नुभयो।
अस्पतालमा चिकित्सक (विशेषज्ञं मेडिकल अधिकृत) १२७ जना, नर्सिङ्ग कर्मचारी २९४ जना, पारामेडिक्स कर्मचारी १५७ जना, प्रशासनिक कर्मचारी (प्रशासन, लेखा र आई टी) २८ जना, कार्यालय सहयोगी÷सरसफाईकर्मी १८९, सुरक्षागार्ड २६ जना तथा अन्य २८ जना कर्मचारी गरी जम्मा ८५१ जना कर्मचारीहरु कार्यरत रहेका छन् । तत्कालीन राणाप्रधानमन्त्री श्री ३ चन्द्र समशेर जबराको पालामा वि.सं. १९६७ फागुन १५ गते सेन वंशी राजा मणिमुकुन्द सेनको दरबार (हालको पारि बुटवल फुलबारी पार्क) मा २ जना भारतीय चिकित्सक र ६ शैयाबाट लुम्बिनी प्रादेशिक अस्पतालको सुरुवात भएको थियो । वि.सं.१९९८ सालमा रक्तसंचार गृह रकेको स्थान हँुदै बुटवलउप–महानगरपालिका वडा नं.६ हाल अस्पताल रहेको स्थानमा स्थापना भई यस अस्पतालले स्वास्थ्य सेवा उपलब्ध गराउँदै आएको छ ।
अस्पतालले ११४ औं वार्षिकोत्सवको अवसरमा विभिन्न अतिरिक्त क्रियाकलापसमेत आयोजना गरेको थियो । अस्पताल परिवारबिच आयोजना गरिएका प्रतियोगिताहरु फुटबल, भलिबल, क्रिकेट, म्याराथन, कवितावाचन तथा रक्तदान कार्यक्रममा सहभागीहरुलाई मूल समारोहमा सम्मान तथा पुरस्कार वितरण गरिएको थियो ।
