काठमाडौं- नेपालमा सोमबार थप १८६ जनामा कोरोना भाइरसको संक्रमण पुष्टि भएको छ। यो सँगै कोरोना भाइरस संक्रमितको संख्या १७ हजार ८४४ पुगेको छ।
४ हजार २ सय १६ जनाको पीसीआर परीक्षण गरिएकोमा १८६ जनामा कोरोना पोजेटिभ देखिएको हो। हालसम्म सक्रिय संक्रमितको संख्या ५ हजार ९३६ रहेको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले सोमबार नियमित लाइभ अपडेटमा उक्त जानकारी दिएका हुन्।
कहाँ कति थपिए ?
डा गौतमका अनुसार बीपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा सुनसरीका २ जना, कोशी अस्पतालमा गरिएको परीक्षणमा झापाका एकजना, सुनसरीका ४ जना र इलामका एक जनामा कोरोना संक्रमण पुष्टि भएको छ।
यसैगरी प्रादेशिक जनस्वास्थ्य प्रयोगशाला विराटनगरमा गरिएको परीक्षणमा मोरङका एकजना र झापाका २ जना, जगेन्द्र नारायणसिंह अस्पताल राजविराजमा गरिएको परीक्षणमा सिराहाका एकजना र सप्तरीका ९ जना संक्रमित भएका छन्।
यस्तै प्रादेशिक जनस्वास्थ्य प्रयोगशाला जनकपुरमा धनुषाका २ जना, नारायाणी अस्पताल वीरागंज प्रयोगशालामा गरिएको परीक्षणमा पर्साका ४ जना र बाराका ४६ जनामा संक्रमण पुष्टि भएको छ।
यस्तै राष्ट्रिय जनस्वास्थ्य प्रयोगशाला काठमाडौंमा गरिएको परीक्षणमा काठमाडौंका २ जना, सर्लाहीका २३ जना र सोलुखुम्बुका ४ जना, पाटन अस्पतालमा गरिएको परीक्षणमा ललितपुरका एकजना संक्रमित भएका छन्।
पोखरा स्वास्थ्य विज्ञान प्रतिष्ठान पोखरामा गरिएको परीक्षणमा कास्कीका ८ जना र लमजुङकाएकजना, प्रादेशिक जनस्वास्थ्य प्रयोगशाला पोखरामा गरिएको परीक्षणमा तनहुँका २ जना र स्याङ्जाका एकजना संक्रमित भएका छन्।
यस्तै भेरी अस्पताल नेपालगंजमा गरिएको परीक्षणमा बाँकेका २ जना, रोल्पाका ४ जना, सल्यानका २ जना , रुकुमपूर्वका ७ जना र दाङका ५ जना, लुम्बिनी प्रादेशिक अस्पताल बुटवलमा गरिएको परीक्षणमा दाङका एकजनामा कोरोना संक्रमण पुष्टि भएको छ।
यस्तै दैलेख प्रयोगशालामा गरिएको परीक्षणमा दैलेखका एकजना, सुर्खेत प्रादेशिक अस्पतालमा गरिएको परीक्षणमा दैलेखका एकजना, सल्यानका एकजना, सुर्खेतका ४ जना, हुम्लाका एकजना र कालिकोटका एकजना, डडेल्धुरा अस्पतालमा गरिएको परीक्षणमा डोटीका ४० जना संक्रमित भएका छन्।
यस्तै सेती प्रादेशिक अस्पतालमा गरिएको परीक्षणमा कैलालीका एकजना संक्रमित भएका छन्।
२४ घण्टामा थप १७३ जना कोरोना संक्रमणमुक्त
पछिल्लो २४ घण्टामा थप १७३ जना कोरोना संक्रमणमुक्त भएका छन्। योसँगै नेपालमा कोरोना संक्रमण भएर निको हुनेको संख्या हालसम्म ११ हजार ८६८ पुगेको छ । निको हुनेहरुको यो संख्या ६६.५१ प्रतिशत रहेको मन्त्रालयले जनाएको छ।
उनीहरू देशका विभिन्न स्थानका अस्पतालबाट संक्रमणमुक्त भएको स्वास्थ्य तथा जनसंख्या मन्त्रालयले जानकारी दिएको हो।
मन्त्रालयका अनुसार हालसम्म कोरोनाका कारण ज्यान गुमाउनेको संख्या ४० पुगेको छ।