बीपी गौतम
बुटवल, जेठ १५ । अर्थमन्त्री वर्षमान पुनले मंगलबार प्रस्तुत गरेको आगामी आर्थिक वर्ष २०८१÷८२ को बजेटमा रुपन्देहीमा विभिन्न योजनाहरु अघि सारिएका छन् । बजेटमा रुपन्देहीका लागि अधिकांश चालु आयोजनालाई निरन्तरा दिइएको छ भने केही नयाँ आयोजनाहरु समेत प्रस्ताव गरिएको छ । अर्थमन्त्री पुनले बजेट मन्तव्यमार्फत् बुद्ध जन्मस्थल लुम्बिनीलाई ‘बर्थिङ्ग हव’ को रुपमा प्रवद्र्धन गरिने जनाएका छन् । लुम्बिनीमा ठूलो क्षमताको बर्थिङ्ग सेन्टर स्थापना गरिने चर्चा चलिरहँदा अर्थमन्त्री पुनले आगामी आर्थिक वर्षको बजेटमा यो विषयलाई सम्बोधन गरेका हुन् ।
लुम्बिनी क्षेत्रबाट प्रतिनिधित्व गर्ने प्रतिनिधिसभा सदस्य बासुदेव घिमिरेले लुम्बिनीलाई बर्थिङ्ग हव बनाइँदा बाह्य पर्यटन प्रवद्र्धनमा टेवा पुग्ने विश्वास व्यक्त गर्नुभयो । यसको लागि सरकारले आवश्यक प्रक्रिया आगामी आर्थिक वर्षको प्रारम्भबाटैं अघि बढाउनुपर्ने बताउँदै यस कार्यमा आफूले आवश्यक समन्वय गर्ने उल्लेख गर्नुभयो । ‘बुद्ध जन्मस्थल लुम्बिनीलाई बर्थिङ्ग हव बनाउने विषयमा हाम्रो निरन्तर पहल थियो । अहिले बजेटमा आएको छ । यसको सार्थक कार्यान्वयनमा सबैको सहयोग अपरिहार्य छ ।’ उनले भने ।
बजेटमा प्रमुख धार्मिक एवं पर्यटकीय स्थल लुम्बिनी र लुम्बिनी करिडोरमा रहेका नगरपालिकामा एकीकृत सहरी पूर्वाधार विकास गरिने उल्लेख छ ।
यस्तै बुटवलमा उपलब्ध सरकारी तथा निजी भवन समेत उपयोग गरी उच्च गतिको इन्टरनेट, विद्युत्, सुरक्षा लगायतका पूर्वाधार सहित सूचना प्रविधि पार्क सञ्चालनको काम अघि बढाइने पनि बजेटमा जनाइएको छ । न्यू बुटवल–गोरखपुर चार सय केभी अन्तरदेशीय प्रसारण लाइनको निर्माण कार्य सम्पन्न गरिने, भरतपुर, पोखरा र बुटवललाई जोडेर गण्डकी आर्थिक त्रिभुज परियोजना सञ्चालन गरिने, निर्माणाधीन नारायणगढ–बुटवल सडकखण्डको विस्तार कार्य आगामी आर्थिक वर्षमा सम्पन्न गर्ने प्रतिबद्धता बजेटमा गरिएको छ भने बुटवल–पोखरा सडकलाई डेडिकेटेड दुई लेनमा विस्तार गरिने जनाइएको छ ।
पोखरा–बुटवल खण्डलाई विद्युतीय उपकरण, जुत्ता, लत्ताकपडा, कार्पेट तथा घरायसी प्रयोगका वस्तु तथा सेवा सम्बद्ध उद्योगको केन्द्रका रुपमा विकास गरिने, मोतिपुर औद्योगिक क्षेत्रको निर्माण कार्य सुरु गरिने पनि बजेटमा उल्लेख छ । भैरहवाको एकीकृत जाँच चौकीको निर्माण कार्य सम्पन्न गरिने, बुटवल मेडिकल कलेज स्थापना कार्य अघि बढाइने, बुटवल–गोरुसिङ्गे सडक स्तरोन्नती कार्य सुरु गरिने पनि बजेटमा जनाइएको छ । सालझण्डी–सन्धिखर्क–ढोरपाटन सडक स्तोरन्नती गरिने, तिनाउ नदीमा सिग्नेचर ब्रिज निर्माण कार्य अघि बढाइने, सिद्धबाबा सुरुङ्ग मार्गको मुख्य सुरुङ्ग निर्माण कार्य सम्पन्न गरिने पनि बजेटमा उल्लेख छ ।