बुटवल । नेपाल पत्रकार महासंघ रूपन्देहीले सदस्यता शुद्धीकरण भन्दै पूर्वाग्रह ढंगले सदस्य हटाउने निर्णय र सिफारिश गरेको भन्दै प्रेस चौतारी नेपाल रुपन्देहीले गम्भीर असहमती व्यक्त गरेको छ ।
प्रेस चौतारीले आज पत्रकार महासंघ रुपन्देहीलाई ज्ञापनपत्र बुुझाउँदै आफ्नो असहमती प्रकट गरेको हो । महासंघ केन्द्रीय समितिले बनाएको मापदण्ड अनुसार सदस्यता शुद्धीकरण निष्पक्ष र पारदर्शी ढंगले हुनुपर्छ भन्ने मान्यतामा प्रेस चौतारी रूपन्देही दृढ रहेको उल्लेख गर्दैै प्रेस चौतारीले तर पत्रकार महासंघ रुपन्देहीले शुद्धीकरण मापदण्डलाई वेवास्ता गर्दै छुट्टै मापदण्ड तयार गरी उस्तै खालका व्यक्ति कसैको सदस्यता कायम राख्ने र कसैको खोस्ने प्रपञ्च गर्नु नेपाल पत्रकार महासंघ रूपन्देहीको एकता र संस्थागत विकासमाथि गम्भीर प्रहार भएको जनाएको छ ।
“नेपाल पत्रकार महासंघ रूपन्देहीले गरेको निर्णय एकपक्षीय, पूर्वाग्रही र सुनियोजित रहेको ठहरसहित प्रेस चौतारी रुपन्देही अस्वीकार गर्दछ”–ज्ञापनपत्रमा भनिएको छ ।
पत्रकार महासंघ रूपन्देहीलाई यो शुद्धिकरण अभियान एउटा अवसर रहेको, जसले आगामी दिनमा महासंघको आन्तरिक जीवनमा सकारात्मक प्रभाव पार्न सक्ने भन्दै ज्ञापनपत्रमा सामाजिक छवि पनि उचो बन्ने अवसरलाई गुमाएको उल्लेख छ ।
आग्रह, पूर्वाग्रह राखेर सदस्यता शुद्धीकरण गरिएकोले महासंघको मर्म र गरिमामाथि प्रहार भएको ज्ञापनपत्रमा उल्लेख छ । वर्षौंदेखि पत्रकारिता नगरेका सदस्यहरुलाई कुनै संगठनको सदस्य भएकै आधारमा जोगाउने र कुनै संगठनको सदस्य भएको आधारमा हटाउने निर्णय तत्काल सच्याउन प्रेस चौतारी रुपन्देहीले माग गरेको छ ।
आफ्नो मागलाई गम्भीरतापुर्वक लिई यथाशीघ्र निर्णय नसच्याएमा चरणवद्ध आन्दोलनमा जाने चेतावनी पनि चौतारीले दिएको छ । महासंघलाई सांच्चिकै सबै विचार र आस्थामा आवद्ध पत्रकार, पत्रकार सम्बद्ध संगठनहरुको साझा संस्था बनाउने हो भने निर्णय सच्चाउनुको विकल्प नरहेको चौतारीको ज्ञापनपत्रमा भनिएको छ ।
पत्रकार महासंघ रूपन्देही यस्तै एकपाखे र एकलकाटे ढंगले अघि बढे प्रतिवादका लागि आगामी निर्णय कठोर हुँदै जाने चेतावनी पनि प्रेस चौतारीले दिएको छ । ज्ञापनपत्र बुझाउँदै प्रेस चौतारी रुपन्देहीका अध्यक्ष लक्ष्मण पौडेलले सदस्यता शुद्धीकरणलाई खुला र पारदर्शी गर्ने गरी यसअघि भएको छलफल र बैठकमा भएको निष्कर्ष अनुसार अघि बढ्न आग्रह गर्नुभयो ।
ज्ञापनपत्र बुझ्दै महासंघ रुपन्देहीका अध्यक्ष रामराज पोख्रेलले सदस्यता शुद्धीकरणको विषय अझै छलफलको क्रममै रहेकाले सबै विषयमा आवश्यक छलफल गरेर अघि बढ्न तयार रहेको र त्रुटी भएको भए सच्याउन पनि तयार रहेको बताउनुभयो ।